返Tesla維修 + 更換 Model X 新式翼門開關制

 In Top Banner Middle, 新Tesla車主, 最新資訊

話說上個月幾乎日日都落大雨,翼門引水道開始出現問題,每次大雨泊室外再取車時,車頂所積聚的雨水都會流落座椅,搞到我個仔 car seat 濕晒坐唔到。七至九月屬傳統雨季,如果每次落雨揸車都要手抱其實好危險,所以急急打去 Tesla 維修。很多人以為返 Tesla 仲係要有排等,現在都快咗好多了,加上現在西環都有維修中心,正常一兩星期都約到返廠。

tesla-guide-tesla-model-x-falcon-wing-door-rain-leak-02
⬆︎ 一落大雨,這個位置就漏水,現在仍隱約見到水漬

落雨翼門漏水唔係正常?竟然有得整?

當然唔正常啦,好多人當初見到 Model X 個翼門設計就第一時間批評話落雨點算,其實 Tesla 設計 Model X 時是有考慮到這一點的,所以翼門是有引水道避免開啟翼門時雨水從車頂流入車廂,正常情況下是不會漏水的,今次我部車出現漏水問題應該是因為膠件出現老化及移位,所以如果你部車一直出現落水漏水情況,其實係有得整,記得約時間返廠整,免費的!

tesla-guide-tesla-model-x-falcon-wing-door-rain-leak-03
⬆︎ 翼門是有引水道避免開啟翼門時雨水從車頂流入車廂

另外近期得知 Model X 的翼門開關可以加錢換新版本,既然返得去就一次過換埋佢,盛惠 $790。原本想換埋新版的前座門鎖,新版本的門鎖開口是無聲的 (即係唔會有好嘈的「喳」一聲),但 Tesla 維修中心回應是因為零件非常短缺及工序繁複,除非有壞否則都唔會幫客人更換,就唯有打消念頭了。

要擺低幾日,借埋 Loaner Model S P90DL!

因為事前已經得知要擺低幾日,而我因為每日都要用車關係,所以就問 Tesla 借 Loaner 代步,原來只要你事前 book 定,Tesla 就可以預先安排定一部 Loaner 給你,但如果你即場問就要視乎當時有無 Loaner 可供借出了。

今次我的 Loaner 是 Tesla Model S P90DL,借返黎當然要玩佢個 0-100km 2.7sec 的 Ludicrous Mode 啦!對上一次玩 Ludicrous Mode 已經是 2 年前美國 Model 3 發佈會的 Model S test ride 了。今次係自己親手開 Ludicrous Model ,感覺一樣是壓爆心臟咁,然後不其然地咀裡伴除住幾句粗口….

亦因為好耐無揸過 Model S,揸返 Model S 給俾我的第一個感覺,是車身很低很低,無論上落車、停車場出入閘拍卡、甚至幫個仔上落 car seat 都覺得好唔方便。不過操控上始終 Model S 靈活很多,入彎話轉就轉很順暢。但對於現在揸慣爸爸車的我,始終都係鍾情 Model X 多一點。

過程順暢,要大讚維修顧問 Mark Mak 及 Clara Suen

整個過程由預約至取車我都相當愉快,首先 Mark 就唔駛講啦,在心中!Clara 預先幫我安排到一部 loaner 給我代步,然後整個過程都跟得好足,笑容滿面有耐性之餘亦相當 nice,每個步驟都解釋得很清楚,感受到是用心幫我解決問題的,到最後交車亦遠超乎預期的早,所以十分感者兩位於過程中的幫忙。

有關新版本翼門開關制

舊版本的翼門開關制對我而言是幾混亂的設計,首先 Pull to open & Push to close 這個設計並不是人人都能夠一用就識。很多坐我車的朋友第一次用都分唔到究竟是 pull to open 還是 pull to close,究竟是「拉一下」還是「拉實」來開門亦分不清,最後很多時都要由我幫坐後座的朋友開關車門。另外有時如果按得不夠大力,道門會無反應,唔知其他 Model X 車主都無面對過我以上的問題?

而新版本的開關制則相對清晰很多,只有上下兩個按鍵,而且按下去感覺清脆脷落,簡單直接得多,對我而言這 $790 是值得俾的。

tesla-guide-tesla-model-x-new-falcon-wing-door-switch
⬆︎ 新版本的開關制只有上下兩個按鍵,按下去清脆脷落
tesla-guide-tesla-model-x-old-falcon-wing-door-switch
⬆︎ 舊版會留給你作為紀念😂
相關文章
  • Tesla Model X 香港常見問題集

    有見越來越多 Model X 車主陸續交車,隨了大家都是新車主外,當中還有一部分車主未接觸過電動車的。我以 Model X 車主及接近 2 年 Tesla 電動車齡的經驗,整理了一個 Model X 車主常見問題集,希望幫到大家。

  • [進階篇]香港停車場實試 Model X 翼門

    香港停車場遠比外國窄,樓底又矮,未收車前總會擔心翼門會否開唔到,就算開到都會否撞到隔離部車,甚至撞埋天花。我比較重視科學精神,與其每次泊車都估估下,倒不如試盡佢。

  • [入門篇] Model X 開關門方式一覽

    已經收車幾天了,Model X 結構比較複雜,尤其鷗翼門吧,前前後後花了幾天時間了解鷗翼門的運作,現在總算初步掌握到 Model X 鷗翼門的操作原理,現在逐一分享個人心得給準備收車的車主,先開始入門篇,希望幫到大家。