應唔應該裝Dual Charger?

By
 In 充電相關

(註:Dual Charger 只適用於 Facelift 前的 Model S)

安裝Dual Charger好處是完全發揮三相32A電的最大輸出,充電時間縮短一倍。

如果本身知道乜野係Dual Charger,可以直接scroll落去最底睇個人建議。但如果唔了解Dual Charger係乜,首先要了解單相電和三相電的分別。

分辨單相電及三相電充電站

一般而言,如果充電器插口係屋企用緊果隻三腳插,就一定係英式單相13A的慢速充電。反之,如果充電器插口是可以用跟車的藍色中速充電線插入的,就是中速充電。下面附上一些圖片助你分辨。

3phase-32A-HK
三相32A充電:大約5小時

32A
單相32A充電:大約12小時

13A
單相13A充電:大約30小時

 

「三相電」跟「單相電」的分別

簡單而言,三相電可以說成同一時間給你3個相附相成的電源。三相32A電意思是最高可以充電每小時32km x 3 = 96km,比每小時32km的單相電足足快3倍。

 

什麼是Dual Charger?

基本上剛購入的Model S只有Single Charger,每相電最高輸入只有16A,即使用三相32A充電站充電,最高輸入上限只為16A x 3 = 48A。

安裝Dual Charger後,每相電最高輸入達到32A,能夠讓你完全發揮三相32A的充電速度,即為32A x 3 = 96A,1小時充電將可以行駛96km。

即使沒有安裝Dual Charger,三相32A最少都可以享有48A,仍然比單相32A為快50%,所以無論你部車有無裝Dual Charger,三相32A充電站點都係快D。

有提供三相32A中速充電的停車場

twin-chargers4_1024x1024

上圖就是Dual Charger,是安裝在車內的,所以安裝Dual Charger後Model S外型並不會改變。(有人以為Dual Charger係指用兩個充電器同時插落部車度…)

安裝Dual Charger費用HK$17,100,可以打電話去Tesla預約安裝,上次問過要擺低部車一星期左右。

 

P.S. 如果我裝左Dual Charger,我去13A慢速充電站係咪可以去到26A?

當然唔會啦!安裝咗Dual Charger只係代表你「輸入」最多去到每雙32A,而13A慢速充電只是「輸出」單相的13A,所以最多仍然只係13A。所以Dual Charger對於13A慢速充電係冇任何幫助的。

 

個人建議

屋企樓下車位有得拉充電線

可以計一計自己每天大約行幾多公里,例如每天行100公里,就算樓下只能夠拉到13A慢速充電,如果你每晚泊車時間有8小時,第二朝已經充到13A x 8 = 104km,即是無需要用到公共停車場的充電站,所以無Dual Charger都得。

 

樓下無得拉充電線

咁就要視乎你屋企或工作環境附近有無Tesla Superchargers,同埋你能否非繁忙時間 (例如11:00 – 13:00 / 15:00 – 18:00) 去充電。Tesla Superchargers因為1小時已經充滿電,加上免費,好多車主都選擇去Superchargers充電,所以繁忙時間好多時都要排隊先有得充電。如果你只能夠返工放工時間充電,加上附近有三相32A充電站,安裝Dual Charger去相對無乜人爭的三相32A充電絕對係一個好選擇,減少對Supercharger的依賴,而且三相32A充電站亦將會越來越多。

 

如果工作時間很彈性

咁就幾時充電都得啦!我通常都選擇非繁忙時間去充電,去Supercharger充電通常都唔駛等,充電呢1小時做下自己野,時間成本接近0。除非未來Superchargers連非繁忙時間都爆,暫時黎講我都無需要安裝Dual Charger。