如何 DIY 簡單修補擋風玻璃裂痕

 In 保養及補品, 最新資訊, 科技。生活

早幾日揸車,駛到汀九橋突然聽到擋風玻璃「啪」一聲巨響,已經心知不妙,再望清楚就發現塊擋風玻璃俾石仔彈到裂左,裂痕足足有2cm…. 其實幾個月前都係屯門公路俾大型貨車石仔彈花咗,不過遠不及今次嚴重。

⬆︎ 條裂痕足足2cm,而家睇返張相都好肉痛
⬆︎ 條裂痕足足2cm,而家睇返張相都好肉痛

我打返去 service center 報價,換過塊玻璃要 $8xxx,我份車保只係保到 $5000,但如果唔理佢,裂痕有機會越黎越大。不幸中之大幸,早前我上網買咗支可以修補擋風玻璃裂痕的 repair kit 看門口,今次終於大派用場了。

⬆︎ Rainx Windshield Repair Kit
⬆︎ Rainx Windshield Repair Kit
⬆︎ 根據官網描述,呢支repair kit可以修補呢啲裂痕
⬆︎ 根據官網描述,呢支repair kit可以修補呢啲裂痕

動手自己修補玻璃

呢支 Rainx Windshield Repair Kit 我係從 Amazon 訂返黎,連運費大約 HK$140 左右。上網睇過好多 Youtube 教學,效果都好好,加上之前聽過好多 Tesla 車主都有俾石仔彈爆擋風玻璃的經驗,加上玻璃裂痕係越早修補越好,所以一早買定一支看門口,所以都算不幸中之大幸。

⬆︎ 見到都肉痛
⬆︎ 見到都肉痛

我之前未試過修補玻璃,所以起初都有點擔心自己做得唔好,不過包裝內有跟說明書,再睇咗幾條 Youtube 片。只要跟住步驟做,其實比想象中容易的。

事前準備

開始前,要先準備以下工具及環境:

– Windshield Repair Kit (內含修補液、支架、刀片、及透明膠片
– 酒精消毒紙巾 / 酒精 + 纖維布
– 紙巾
– 吸收到陽光的戶外 MUST!

留意,整個過程建議喺室外做,唔好喺室內停車場整好先揸出去曬。

⬆︎ 開箱,內含說明書,所以唔驚睇唔明
⬆︎ 開箱,內含說明書,所以唔驚睇唔明

由於 Youtube 及說明書已經提供豐富教學,跟住做一定唔會有問題,所以我主要會分享一些過程中需要留意的細節。

Check Point 1: 用刀片刮走碎石

用隨包裝附上的刀片,輕輕力刮走殘留在裂痕內的碎石,再用酒精消毒紙巾抹走灰塵,以免注入修補液後灰塵殘留在玻璃內。

Check Point 2: 要確保固定元件對正裂痕

因為被車頭頂住,所以比較就位難將固定工具對正裂痕 (你到時就會明我講緊乜),所以要喺車廂望返出去,確保固定中具中間的圈位對正裂痕 (如下圖):

Check Point 3: 想效果理想,修補液容器要擰實

將固定架定好後,下一步就要將修補液容器擰入去固定架,記緊要擰實,確保修補液注入玻璃後沒有空氣殘留。

Check Point 4: 修補液 4 -6 滴,等 6 – 8 分鐘

視乎玻璃裂痕大小,4 – 6 滴足夠,然後等 6 – 8 分鐘,確保擋風玻離吸收充足陽光。

⬆︎ 幾分鐘後,痕裂明顯減少
⬆︎ 幾分鐘後,痕裂明顯減少

用後感:不能夠 100% 修復,但效果頗明顯

當然自己都心裡有數,要修補到玻璃完全無花痕應該無可能,但修復到只有 5mm 的痕跡 (已經不叫做裂痕了,下圖因為相機點影都影唔到,用布蓋住先影到),加上裂痕不會再擴大,比較安全。網上其實有更多修補玻璃的進階做法,但需要使用的工具更繁複,成本更高,這套 repair kit 成本低之餘做法亦簡單,門外漢如我都識得做。

⬆︎ 完成後,裂痕消失,只剩下5mm左右的痕跡
⬆︎ 完成後,裂痕消失,只剩下5mm左右的痕跡

聽過好多 Tesla 車主都有俾石仔彈爆玻璃的經歷,如果好似我的情況,未致於爆但又有裂痕,保險 claim 唔足,整又太貴,唔整又危險。一支玻璃修補液可以修補玻璃到只有微小痕跡,又可以令情況唔再惡化,相比換過塊玻璃,只需 HK$140 左右絕對超高性價比。始終 shipping 都要時間,出事先買可能太遲,強烈建議車主買定一支看門口。

Link: https://amzn.com/B00IPS4APU

相關文章
  • 返Tesla維修 + 更換 Model X 新式翼門開關制

    話說上個月幾乎日日都落大雨,翼門引水道開始出現問題,每次大雨泊室外再取車時,車頂所積聚的雨水都會流落座椅,搞到我個仔 car seat 濕晒坐唔到,所以急急打去 Tesla 維修。

  • 再幫襯 GTECHNIQ,鍍膜質素實在太好了

    有睇開我文章的車友都知道,我去年選擇了 GTECHNIQ 幫我部 Model S 做鍍膜 coating (前文:Gtechniq,果然很堅的 coating 鍍膜服務)。到今次 Model X,老闆 Johnny 很快便推出了 [...]

  • Tesla Model X 香港常見問題集

    有見越來越多 Model X 車主陸續交車,隨了大家都是新車主外,當中還有一部分車主未接觸過電動車的。我以 Model X 車主及接近 2 年 Tesla 電動車齡的經驗,整理了一個 Model X 車主常見問題集,希望幫到大家。