fbpx

揸咗Tesla 3個月,我唔會再買汽油車了

 In Model S/X, 最新資訊, 最新評測

Tesla Model S車主 體驗1個月後的評測 至今又過多2個月,不經不覺收車亦剛剛好3個月了。跟剛收車一個月時相比,開始發現 Tesla 都有不足之處,不過我都幾肯定我唔會再買返汽油車了。

有睇我上一篇文的朋友,都知道我的狀況。一如以往,我居住屯門,於荃灣工作,一星期有一至兩天到九龍區開會,假日亦會跟家人到九龍區用饍和閒逛。屋企同公司車位無得拉線充電,兩邊都有收費的充電站,但我無用過。我偶爾會 enjoy 起步加速的快感,但並不太追求速度上的極緻,駕車習慣是僅僅去到 speed limit (有時多少少啦,屯門公路,你懂的)。為減少充電次數和令家人坐得舒適,一般而言我是揸斯文車的。我的車款是 Model S 70Doption 有天窗、Smart Air SuspensionSport Seat21″鈴。

3個月,5500公里,繼續$0

我本身有點強迫症,初期比較緊張部車唔夠電,會比較嚴守 100km 左右就去充電的紀律。自從有一次試過因為全日 schedule 太緊迫,唔夠時間充電而去到得返 15km 嘅嚴峻情況之後,就開始覺得「原來得返 100km 都仲可以頂到好耐」,現在已經完全唔擔心唔夠電的問題了。

⬆︎得返15km...
⬆︎得返 15km...

因為$0充電,一定係揸車抵過搭車,所以唔經唔覺就行咗 5500 公里。因為習慣了電動車那種無聲無氣,坐返朋友的汽油車就覺得汽油車的 engine 好嘈、起步好「lup」。基本上,汽油車踩油門的力度與所產生的動力是不成比例的,汽油車踩油門就係「加速」。但電動車就唔同,動力與腳掌力度成正比,你踩幾大力就係「立即」去到幾快。雖然有點刻薄,但燃油驅動這種方式真的開始落後了,物理上係無可能做到電動車一起步已經達到最大扭力的輸出。

駕駛體驗

已經3個月了,我仍然很嚮往每天揸住 Tesla 周圍去的感覺,唔駛擔心油錢,喜歡大腳就大腳、斯文就斯文,70D 已經足以嚇親好多朋友了。依然每日睇住 17” Dashboard 上的 Google Maps 決定行邊條線,唔駛擔心塞車中伏。v7.1 新加入 Spotify 簡直無敵,跟太太駕車,我一邊駕車,太太另一邊用 Spotify 隨住心情 search 不同種類的歌曲,唔需要再只局限於自己部電話同 USB 入面的歌曲。心血來潮,突然諗起想聽返邊首舊歌,就立即用 Spotify search,諗起咩歌就聽咩歌,揸車嘅享受簡直到左第二個層次!早幾日天氣得返 1,開車前 15 分鐘開 Tesla 手機 App 暖定部車,一上車就 20 度室溫,跟車外簡直是兩個世界。以上的駕駛體驗,除了 Tesla,我不認為暫時有邊部車可以取代到。

Parking Sensor 唔多好用

對我而言,要數最唔滿意的地方,就係泊車功能。一般有 parking sensor 的汽車,倒車時會以「嘟嘟」聲的密度而決定距離障礙物有幾近。但 Model S 唔同,無論幾接近障礙物,Model S 都只會發出相同低密度的「咚咚」聲,到接近障礙物尚餘少於 30cm 左右,就會立即變為一聲比較高音的「咚」(下稱高音咚) 以提醒你停車,但只有咚一聲短響,唔會長響,我有好多次因為唔習慣這種提示方式而爭少少撞牆。

此外,泊 L 位時通常是「車後側」先接近車位,由於香港車位比較窄,泊車時車後側很接近隔離部車是很常見的事情,而因為 Model S 車前後側都同樣有感應器,所以好容易因為車後側很接近隔離部車而誤報以「高音咚」提醒你停車,往往令我要停低部車再 check 清楚是否要撞到隔離,令我泊車需要多一兩手軚。

車後鏡由於是超廣角鏡頭的關係,完全無助我睇位,唯一給我的作用是泊車時 mon 上的兩條白色線幫助我擺正部車。

以上種種問題我期望新 firmware update 可以改善,例如提供多一種 parking sensor alert mode 給予不同車主適應,畢竟咁大部車,parking sensor 及安全性顯得好重要。

Auto Park 泊 S 位一流

雖然 Parking Mode 很雞肋,但個人認為 Auto Park 係相當實用的功能。對於體積比一般車更大部嘅 Model S 就更加顯得實用。我重覆試過好多次唔同地方,即使香港車位較窄,都一樣可以成功泊到,仲要係一至兩手搞掂。咁大部車,喺香港泊S位係唔容易,條路又多車,就算俾你泊到,分分鐘都要多過一手,泊得稍為慢少少都俾後面啲車 boot 到你好緊張。到頭來一係就放棄,一係就承受住巨大壓力泊,心急少少就 hi 花左部車。

⬆︎Auto Park 泊S位相當實用
⬆︎Auto Park 泊S位相當實用

有咗呢個 Auto Park,基本上可以交晒俾部車完成,個位泊得好靚又餘,泊車速度仲幾快!如果泊S位缺乏信心嘅朋友,我個人建議 option加呢個功能。

聽得最多依然係「充一次電行到幾遠?」

每次有朋友見到我揸 Tesla,第一句99都係問「充一次電行到幾遠」,其實真係好視乎 Model S 型號的電池量,同埋你揸車幾大腳,以 Tesla 的最入門款式 Model S 70 為例,如果係斯文車,充滿電實際最少都有約 310km。所以,下次,唔好再問揸緊電動車朋友呢個問題了,因為充一次電行到幾遠呢個問題真係幾難答的 (我諗如果有人問你入一次油可以行到幾遠,你都未必識答啦….)。

後記

自從換了 Tesla,身邊已經有幾個朋友受我影響訂咗同準備訂 Tesla 了。電動車絕對比你想象的更好,身邊有揸電動車的朋友,不妨問問佢地有咩睇法。或者等到你自己都打算訂一部 Tesla 之後,我敢打賭你都未必會再想揸返汽油車了。

0